Azərbaycan Respublikası Prezidentinin 2008-ci il 25 avqust tarixli Sərəncamı ilə təsdiq olunmuş “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”nın həyata keçirilməsi üzrə Tədbirlər Planında Azərbaycanda “elektron ticarət”in yaradılması sahəsində işlərin intensivləşdirilməsi barədə İqtisadi İnkişaf Nazirliyinə tapşırıq verilmişdir.
Tapşırığın icrasını təmin etmək üçün sahibkarların, xüsusilə də kənd təsərrüfatı məhsulları istehsalçılarının sərbəst bazara çıxışının dəstəklənməsi məqsədilə Almaniyanın Texniki Əməkdaşlıq Cəmiyyətinin (GTZ) “Özəl sektora dəstək proqramı” çərçivəsində İqtisadi İnkişaf Nazirliyi tərəfindən “elektron ticarət”lə bağlı veb portalın yaradılması nəzərdə tutulur.
Artıq İqtisadi İnkişaf Nazirliyi və “GTZ” təşkilatı “elektron ticarət”lə bağlı veb portalın yaradılması istiqamətində işlərə başlamışdır. Belə ki, yaxın aylar ərzində veb portalın idarə edilməsi, həmçinin saxlanması xərclərinin maliyyələşdirilməsi və s. sahələrdə donorlarla danışıqlar aparılacaq.
“Elektron ticarət”lə bağlı veb portal istifadəyə verildikdən sonra bu sahədə ictimaiyyətin, o cümlədən, kənd təsərrüfatı məhsulları istehsalçılarının və sahibkarların məlumatlandırılması və təlimlərin keçirilməsi ilə bağlı tədbirlər görüləcəkdir.
